Gott er að búa til hamborgara úr hakkinu áður en það er fryst, þá eru þeir tilbúnir beint á pönnuna eða á grillið.

Best er að geyma steikurnar í ísskáp í 10-12 daga áður en þær eru frystar. Þá eru þær meyrar og tilbúnar þegar á að elda þær.

Það er líka hægt taka nautasteikurnar úr frysti 6-7 dögum áður en þær eru eldaðar og láta þær þiðna í ísskáp. Við það halda þær áfram að meyrna og verða mjúkar og safaríkar við eldun.

Það er best að elda nautakjöt þegar það er við stofuhita. Þess vegna er gott að taka það út úr ísskápnum minnst tveimur tímum áður en það er eldað.

Við mælum með að steikurnar flatsteik og klumpur séu steiktar í heilu lagi. Fyrst brúnaðar á pönnu og síðan steiktar í ofni. Einnig er gott að grilla þær. Þá er gott að snögg steikja þær á háum hita allan hringinn og síðan slökkva fyrir hitann á öðrum helmingi grillsins og leggja steikina þar. Miða má við að 1 kg af kjöti þurfi ca. 30 mín steikingu eða þangað til kjötmælirinn sýnir 52-55°C.

Þegar nautasteikur eru steiktar í heilu lagi er best að láta þær hvíla í ca. 10-15 mínútur eftir steikingu, áður en þær eru skornar. Gott er að leggja yfir þær álpappír og viskustykki á meðan beðið er.

Það er ekki sama hvernig kjötið er skorið. Það á alltaf að skera nautakjöt þvert á vöðvann þ.e. vöðvaþræðina. Í flestum steikum liggja vöðvaþræðirnir langsum eftir allri steikinni Ávallt skal fylgjast vel með hvernig vöðvaþræðirnir liggja.

Við mælum með að ef nota á krydd, að krydda kjötið eftir steikingu. Salt og pipar eru yfirleitt besta kryddið.